Organizata jo-fitimprurëse “Global Financial Integrity” me bazë në Uashington publikoi dy javë më parë raportin vjetor mbi largimin e paligjshëm të kapitalit nga vendet në zhvillim. Ky raport analizon të dhëna për 187 vende, ku përfshihet edhe Shqipëria. Sipas raportit, Shqipëria ka humbur rreth 1 miliard dollarë gjatë dhjetëvjeçarit të kaluar, ndërmjet 2-3% të PBB-së. Joana Allamani e Zërit të Amerikës bisedoi me një nga autorët e raportit, ekonomistin Brian LeBlanc.

Le të fillojmë me konceptet bazë. A mund të na shpjegoni konceptin e largimeve të paligjshme financiare?

Brian LeBlanc: Largimet e paligjshme financiare janë largimet e paregjistruara të kapitalit nga vendet e zhvilluara apo në zhvillim, që është ose i paligjshëm në mënyrën se si fitohet, ose në mënyrën se si transferohet. Kjo përfshin nxjerrje jashtë vendit të kapitalit të siguruar nga një aktivitet tregtare, por që transferohet në mënyrë të paligjshme, nëpërmjet transfertave bankare të paregjistruara, apo pagesave të paregjistruara tregtare, ose nëpërmjet korrupsionit dhe veprimtarive të paligjshme si trafikimi i drogës, apo trafikimi i qenieve njerëzore. Ne nuk jemi në gjendje të përcaktojmë se sa nga këto dalje të paligjshme financiare rrjedhin nga aktivitete të paligjshme dhe sa janë nga aktivitete të ligjshme por që transferimi bëhet në mënyrë të paligjshme.

Cilat janë mënyrat që përdoren për nxjerrjen e kapitalit jashtë? Si funksionon procesi?

Brian LeBlanc: Një shumëllojshmëri mënyrash. Është aq e shumëllojshme sa mund ta shpikë një mendje kriminale.  Ne mendojmë se përafërsisht 80% e të gjitha daljeve të paligjshme financiare janë të lidhura me tregtinë. Dhe këto përfshijnë lëvizjen e kapitalit nga vende me taksa të larta në vende me taksa të ulëta, si një mënyrë për të shmangur taksimin.

Sa i madh është problemi për Shqipërinë, në krahasim me vendet e tjera të rajonit?

Brian LeBlanc: Shqipëria ka humbur rreth 1 miliard dollarë gjatë dekadës së kaluar. Kjo rreth 2 deri 3 për qind e PBB-së. Shifër është dukshëm më e ulët se mesatarja e vendeve të tjera evropiane në zhvillim, prej rreth 5 për qind. Shqipëria është më mirë se Serbia për shembull, ku daljet kanë qenë rreth 20 miliard dollarë gjatë dekadës së kaluar. Kjo nuk do të thotë se problemi nuk ekziston në Shqipëri.  Po ashtu Shqipëria ka të veçantat e saj dhe Serbia të vetat. Nga ana tjetër ne e kemi bërë të qartë se studimi im nuk mund të verifikojë dot gjithë aktivitetet që kryhen me para në dorë, ose pagesat që bëhen në këtë formë.  Pra, ne nuk jemi në gjendje për të përcaktuar saktësisht se sa ndikon ky lloj aktiviteti në Shqipëri, që mund të jetë jo i vogël.

Cilat janë aktivitetet kryesore financiare që luajnë rol në daljen e paligjshme të kapitalit në Shqipëri?

Brian LeBlanc: Shohim se në Shqipëri, shumica kryhet nëpërmjet një procesi të quajtur mbifaturimi i importeve. Në thelb, importuesit në Shqipëri shënojnë shifra më të larta për importet aktuale, një mënyrë për të justifikuar ligjërisht pagesat jashtë Shqipërisë. Kjo gjithashtu rrit vlerën e prodhimit. Kështu që, këto korporata kanë një përfitim të dyanshëm: 1) munden të lëvizin kapital jashtë Shqipërisë në vende ku nuk do të taksohet, dhe 2) rrisin çmimin e mallrave të tyre, për të cilin paguajnë konsumatorët, njerëzit e zakonshëm shqiptarë që blejnë këto importe.

Në raportin tuaj, ju e keni vërejtur një prirje në rritje të daljeve financiare të paligjshme, me ritëm më të lartë se PBB-ja, dhe vendet evropiane në zhvillim, grupi në të cilin përfshihet Shqipëria, me rritjen e tretë më të shpejtë në botë. Pse po shohim këtë prirje, dhe çfarë hapash mund të merren për ta zvogëluar atë?

Brian LeBlanc: Në terma reale, duke marrë parasysh inflacionin, largimet e paligjshme të kapitalit janë rritur rreth 10 për qind në vit gjatë dekadës së kaluar. Dhe sidomos për vendet e Evropës në zhvillim, është rritur si përqindje e PBB-së, një shifër e nxitur kryesisht nga Rusia. Vitin e kaluar, Rusia arriti t’ia kalonte Kinës si eksportuesja më e madhe e kapitalit të paligjshëm në vitin 2011, sidomos sepse është ekonomia më e madhe e Evropës në zhvillim. Arsyeja pse këto dalje janë rritur në mënyrë të qëndrueshme është sepse edhe vendet në zhvillim dhe vendet e zhvilluara nuk kanë marrë vendimet të politike që janë të nevojshme për shkurtimin e tyre. Një nga zbulimet më të rëndësishme të raportit është se ky nuk është problem vetëm i botës në zhvillim, dhe organizatat ndërkombëtare kanë filluar ta pranojnë dhe ta bëjnë të njohur këtë fakt. Ky është gjithashtu një problem i botës së zhvilluar, dhe patjetër, ka probleme në këto vende që shtyn largimin e kapitalit, si klima e dobët e biznesit, korrupsioni , por vendet e zhvilluara janë po aq bashkëfajtorë në marrjen e kapitalit dhe lehtësimin e situatës. Dhe kjo ka ndikim në tregun e zi.

Në raportin tuaj, ju e pranoni se llogaritja e sasisë së kapitalit të humbur është e vështirë sepse transaksionet e paligjshme kanë gjasa të kryhen me para në dorë. Duke marrë këtë në konsideratë, si ishit në gjendje t’i bënit llogaritjet për këtë raport? A mund të na shpjegoni metodologjinë?

Brian LeBlanc: Ne kemi përdorur metodologji të përshtatur nga organizata si Banka Botërore dhe Fondi Monetar Ndërkombëtar, dhe nga akademikët. Kështu që, metodologjia nuk është e jona. Këto janë metoda që janë provuar dhe janë të besueshme, për të llogaritur largimet e kapitalit. Dhe ju të saktë duke vënë në dukje përfshijmë në llogaritje edhe largimet e kapitalit që kryhen me para në dorë, gjë që përbën një sasi të mirë të pjesës kriminale të daljeve të paligjshme financiare. Por ne mund të gjejmë mospërputhje në të dhënat makroekonomike të një vendi. Për shembull, nëse një vend ka më shumë burime të regjistruara fondesh se sa përdorimin e fondeve, domethënë, vend po merr më shumë fonde se sa mund të shpjegojë, atëherë ka një mospërputhje dhe fondet po zhvendosen brenda ose jashtë vendit. Dhe këto zbulohen nga të dhënat që vendi i raporton FMN-së.  Ana tjetër është se ne e pranojmë se shumë njësi ekonomike të korporatave dhe korporata multinacionale lëvizin para me anë të tregtisë, si për shembull, falsifikojnë faturat e tregtisë për të lëvizur para nga një vend në një vend tjetër. Këto janë zakonisht firma tregtare që përpiqen të ulin të ardhurat e tyre të tatueshme, ose t’i lëvizin të ardhurat në një vend me taksa të ulëta, si Zvicra, Luksemburbu, dhe dhjetëra vende të tjera me taksa të ulëta.

Çfarë efektesh kanë largimet e paligjshme financiare në një ekonomi në zhvillim?

Brian LeBlanc: Efekti më i madh që këto kanë është humbja e kapitalit. Shumë njerëz e konsiderojnë analizën tonë si arsye për ligje taksore. Po, ajo është një anë e rëndësishme e saj, por në qoftë se konsideroni se sa humbje kapitali kanë këto vende çdo vit, kjo ndikon shumë. Po të kishte qëndruar në vend, ky kapital do të ishte përdorur për të financuar aktivitetet biznesi, për të krijuar më shumë vende pune. Por në vend të kësaj, ai po largohet nga këto vende në zhvillim në vende me taksa më të ulëta. Dhe kjo i bën vendet në zhvillim më të varura në ndihma nga jashtë, burimet e jashtme për t’i ndihmuar në zhvillimin e tyre, kur në fakt, në qoftë se ata mund të ndalojnë këtë dalje të kapitalit, ata vetë mund të fillojnë të financojnë zhvillimin e tyre. Pra, kjo dukuri ndikon në mënyra të ndryshme. Dhe përkatësisht, këto dalje të paligjshme financiare i shtohen 1 për qindëshit ose 0.5 për qindëshit më të lartë të njerëzve në vend, gjë që inkurajon pabarazinë ekonomike, e cila është biseduar nga shumë organizata ndërkombëtare, si dukuri që ndikon në zhvillimin e një vendi.

Cilat janë rekomandimet që t’i jepnit ligjvënësve?

Brian LeBlanc: Çelësi është transparenca. Të sigurojnë mundësinë për të gjithë që të shohin të dhënat. Në mënyrë të veçantë, duke vënë në dukje se shumë kjo ka të bëjë me sistemin financiar të paligjshëm. Të identifikohen pronarët e një shumë prej këtyre kompanive fiktive që po shtyjnë këto rrjedhje kapitali, është çelësi. Kohët e fundit, vendet e G20-es kanë shprehur mbështetjen e tyre për shkëmbimin automatik të informacionit taksor. Nëse një vend si Shqipëria ose në shumë prej këtyre vendeve të tjera evropiane në zhvillim do t’i bashkoheshin nismës, do të ishte shumë e dobishme për të gjithë. Por ne duhet të jemi në gjendje të dimë se kush janë pronarët e këtyre kompanive fiktive, të cilët bëjnë të mundura këto veprime të paligjshme, dhe të marrin masat e duhura. Dhe ne kemi parë disa rezultate pozitive nga vendet e G20-es, por rezultatet duhet të pasqyrohen nga vendet evropiane në zhvillim, në mënyrë që të shohim ndikimin e këtyre rekomandimeve.

Marrë nga VOA/ Zëri i Amerikës

Një 22-vjeçar është ndaluar nga policia ditën e sotme nën akuzën e armëmbajtjes pa leje. Efektivët e komisariatit numër 3 kanë arrestuar të riun me iniciale V.V. Sipas policisë gjatë kontrollit 22-vjeçarit ju gjet një armë zjarri tip kallashnikov.

Mesditën e sotme është mbledhur Këshilli Bashkiak i Tiranës, nën drejtimin e kryetarit Aldrin Dalipi. Gjatë kësaj mbledhje do të diskutohet projektbuxheti afatmesëm i kryeqytetit për periudhën kohore 2014-2016. Ndërkohë kryetarja e grupit të këshilltarëve socialistë Adriana Berberi deklaroi se zyrtarët e bashkisë së Tiranës, nuk u kanë ofruar këshilltarëve bashkiakë të dhënat e nevojshme, duke kërkuar korrektesë prej tyre. Nga ana e tij kryetari i këshillit Aldrin Dalipi shprehu keqardhje për këtë situatë, duke shtuar se një gjë e tillë ecën prej gati tre vitesh, ndërsa theksoi se gjatë diskutimit të projektbuxhetit, në respekt të këshillit dhe të vendimmarrjes, kryebashkiaku i Tiranës Lulzim Basha, duhet të ishte i pranishëm. Sipas Dalipit, Basha duhet të gjejë kohë që përveç partisë, të jetë i pranishëm në mbledhjen e këshillit dhe të mos tregohet mospërfillës sidomos në një kohë që diskutohet buxheti. “Në një kohë që kryetari i bashkisë nuk paraqitet për projektbuxhetin, kjo do të thotë se Tirana tani është pa kryetar”, u shpreh Dalipi. Nga ana e tij kryetari i këshilltarëve demokrat Ferdinand Poni, tha se projektbuxheti është ofruar nga bashkia e Tiranës, nga kryebashkiaku dhe punonjësit përgjegjës. Gjithashtu ai deklaroi se detyrimi ligjor i kryetarit është paraqitur nëpërmjet buxhetit. Nga ana e tij nënkryetari i bashkisë Eno Bozdo, deklaroi se në buxhet parashikohet rritje punësimi si dhe investime te shumta. Gjithashtu ai shtoi se buxheti për vitin që vjen është 8 miliardë e 645 milionë lekë. Ndërkaq ai bëri një pasqyrë të investimeve rrugore, ku theksoi se kanë përfunduar një sërë segmentesh të rëndësishme, ndërsa rrugë të tjera të asfaltuara janë në proces. “Buxheti total i Bashkisë së Tiranës për vitin 2014 është 8.645.847.000 lekë dhe paraqitet me rritje prej 5% në krahasim me buxhetin e vitit paraardhës. Për vitin 2014, të ardhurat nga taksat e tarifat vendore janë parashikuar në shumën 7.511.533.000 lekë, ose 5% më shumë se parashikimi i vitit 2013. Për vitin 2015, të ardhurat do të jenë 4% më shumë se viti i mëparshëm dhe për vitin 2016 do të jenë 3% më shumë se parashikimi i vitit 2015.Transferta e pakushtëzuar është parashikuar në shumën 1.134.314.000 lekë, ose 3% më e lartë se viti paraardhës, e parashikuar të rritet me 3 % në vit, për periudhën 2014-2016, referuar udhëzimeve të Ministrisë së Financave. Shpenzimet e përgjithshme të Bashkisë së Tiranës për periudhën trevjeçare 2014-2016, për të gjitha funksionet parashikohen respektivisht në masën 8,645,847,000 lekë, 8,996,718,000 lekë dhe 9,238,394,000 lekë, me një rritje në përputhje me rritjen e nivelit të të ardhurave të parashikuara prej përkatësisht 5%, 4% dhe 3%”, deklaroi Bozdo.

Kryeministri Edi Rama, Ministri i brendshëm Saimir Tahiri dhe Drejtori i Përgjithshëm i Policisë së Shtetit Artan Didi kanë marrë pjesë sot në një mbrëmje festive të organizuar në ambientet e Kavaleshencës në Durrës për fëmijët e policëve të rënë në krye të detyrës. Gjatë fjalës së tij Kryeministri Rama deklaroi se qeveria s’do të mbështesë familjet e policëve të vrarë. Ndër të tjera ai theksoi se forcat speciale të policisë ata që gjenden në frontin më të vështirë do të marrin një siguracion special shëndetësor. “Është privilegj që të jem këtu sot si kryeministër i vendit dhe besoj në emër të çdo familje shqiptare të çdo prindi të çdo vajze dhe djali që me siguri do të donte ti përcillte familjeve dhe fëmijëve të dëshmorëve të policisë një urim nga zemra t’ju uroj të gjithëve ju një vit të ri të gëzuar dhe viti 2014 të jetë një vit ëndrrash dhe shpresash të mundshme. Të jetë për fëmijët një vit gëzimi. Duke ju garantuar se ne do të bëjmë gjithçka na takon për të bërë më të mirën që asnjë nga fëmijët e dëshmorëve të policisë mos ndihet vetëm dhe çdonjëra prej nënave të tyre të ketë pranë dorën e shtrirë të solidaritetit tonë dhe mbështetjen e kësaj familje të madhe që është policia e shtetit. Dua t’ju uroj dhe garantoj se me gjithë vështirësitë ne do të bëjmë të pa mundurën për ju do bëjmë të pa mundurën që çdo anëtar i policisë së shtetit të ndihet i qetë i mbështetur dhe me gjithë respektin që meriton dinjiteti i tij si pjesë i një institucioni që është jetik. Besoj qe ne arritëm që jo vetëm me fjale por edhe me vepra tua japim këtë mesazh të fortë të gjithë punonjësve të policisë së shtetit dhe do ta forcojmë duke siguruar jo vetëm një trajtim financiar për të gjithë por duke siguruar vijimësisht mbështetjen morale. Asnjë prej nënave të këtyre fëmijëve të mos ndihet e pa fuqishme për të bërë më të mirën. Dera jonë do jetë gjithmonë e hapur. Nuk do të mungojë asnjëherë vëmendja për çdonjërin e fëmijëve që janë këtu sot nga më të vegjlit te më të rriturit. Ky është një amanet që gjithkush prej nesh do e mbyllë me përgjegjësinë më të lartë. Ata që janë në frontin më të vështirë, sapo kemi firmosur sot një tjetër vendim të qeverisë duke i hapur rrugë trajtimit special për cilindo prej tyre që do të ketë nevojë shëndetësor. Për çfarëdolloj nevoje që të gjithë pjesëtarët e këtyre forcave do të kenë, shteti do të paguaj një sigurim të posaçëm shëndetësor. Një sigurim shëndetësor special për të garantuar me standarde kujdesin shëndetësor të tyre.”- deklaroi Rama.

Drejtoria e Përgjithshme e Doganave dhe Dogana e Tiranës kanë zhvilluar një operacion për të goditur mallrat e falsifikuara. Sipas doganës janë ushtruar kontrolle  në automjete për bllokimin e këtyre mallrave. Në kuadër të operacionit janë bllokuar mallra të falsifikuara me vlerë në treg 90 mijë lekë. Dogana bën me dije se mallrat e falsifikuara janë kapur gjatë kontrollit të mjetit me targë ABR638.

Një person ka humbur jetën mbrëmjen e sotme në fshatin Fartar në Mallakastër. Një motor është përplasur nga një fugon dhe për pasojë ka humbur jetën shoferi i motorit. Efektivë të policisë kanë mbërritur menjëherë në vendngjarje dhe kanë nisur hetimet. Policia bën me dije se viktima është Mehmet Arizaj. Ndërkohë është shoqëruar në polici edhe shoferi i fugonit. Shkaqet e aksidentit ende nuk bëhen të ditura.

Seanca e Kuvendit të Shqipërisë nisi me ceremoninë e betimit të 4 deputetëve të rinj, si kusht për të filluar ushtrimin e mandatit të deputetit. Dorëzimi i mandateve të 4 ministrave të qeverisë “Rama”, si deputetë të PS-së solli që KQZ-ja të vihet në lëvizje për zëvendësimin e tyre. Pas vendimit të KQZ-së për këto katër mandate, duke bërë zëvendësimin e tyre ka bërë që Kuvendi të realizojë procedurën ligjore për zëvendësimin. Këshilli për Rregulloren, Mandatet dhe Imunitetin bëri dje verifikimin e mandatit të deputetëve të rinj. Ministri i Shëndetësisë, Ilir Beqja, u zëvendësua dje nga kandidatja në qarkun e Durrësit, Esmeralda Shkjau. Ministri i Ekonomisë, Arben Ahmetaj, që fitoi mandatin në Gjirokastër, u zëvendësua nga Dashamir Kamberi. Mandatin e fituar në qarkun e Lezhës të Ministres së Mbrojtjes Mimi Kodheli, do ta marrë në Kuvend Mejreme Delishi. Kurse në vend të Lindita Nikollës Ministre e Arsimit, mandati i ka kaluar zyrtarisht Blerina Gjylametit. Ministri i Brendshëm, Saimir Tahiri, nuk e ka dorëzuar ende mandatin, për shkak të mosfirmosjes së dokumentacionit të dorëheqjes në Kuvend. Në rast se do të firmosë dorëheqjen, Tahiri do të zëvendësohet në Tiranë me një femër që është në fund të listës, Erjeta Alhysa, pasi PS në 6 qarqe është gjobitur për mosrespektim të kuotës gjinore.

Prokuroria e Tiranës ka sekuestruar dje dokumente shkresore në Bashkinë e Kamzës, për llogari të hetimit të nisur ndaj kreut të këtij institucioni, Xhelal Mziu. Ai akuzohet për “shkelje të barazisë në tenderë” dhe për “shpërdorim të detyrës”. Objekt i të njëjtit hetim është edhe drejtori juridik i kësaj Bashkie, aktualisht person në kërkim. Ditën e djeshme, përfaqësues të organit të akuzës janë paraqitur në Bashkinë Kamzë, ku kanë sekuestruar një sërë dokumentesh në lidhje me tenderin për ndërtimin e rrugës Laknas-Valias. Sipas Prokurorisë, në tenderimin e kësaj rruge, Mziu ka kryer shkelje ligjore, duke mos ia dhënë atë firmës fituese. Në seancën e masës së sigurisë, ku u la në “arrest me burg”, Mziu pretendoi se firma kishte pasur mangësi në dokumentacion.

Ndërsa Kuvendi po diskutonte amandamentet e propozuara nga partitë politike për buxhetin dhe paketën fiskale 2014, shoqëria civile protestoi kundër rritjes së taksave dhe çmimeve. Në thirrjet drejtuar ligjvënësve, protestuesit kanë kërkuar që Kuvendit ti thotë jo mashtrimit progresiv, pasi sipas tyre 97% e qytetarëve janë kundër këtij buxheti. “Kjo qeveri ndryshe ka thënë gjatë fushatës dhe ndryshe po vepron, duke na mashtruar”, u shprehen protestuesit.

Këshilltarët e majtë të bashkisë së Tiranës i kanë bërë thirrje sot kryebashkiakut Lulzim Basha të marrë përgjegjësitë e tij si kryetar Bashkie. Në një deklaratë për mediat, kreu i Këshillit Aldrin Dalipi, ndërsa risolli në vëmendje se projektbuxheti afatmesëm i Bashkisë për 2014-2016 nuk arriti të kalojë klasën në mbledhjen e së premtes, ftoi Bashën të bëjë transparencë me qytetarët e Tiranës. “I bëjmë thirrje të jetë më serioz me qytetarët e Tiranës dhe të respektojë mandatin e marrë prej tyre. Në këtë mënyrë ne kuptojmë pozicionin e tij në raport me zgjedhjet që do të vinë. Projektbuxheti dje ngeli në klasë dhe duhet të japë një riprovim në ditët në vijim. Ftoj zotin Basha të vijë të dëgjojë ankesat e këshilltarëve, të bëhet transparencë dhe qytetarët të kuptojnë si mund të ndryshojë jeta e tyre në këtë qytet. Ka ardhur koha që në bashkinë e Tiranës të ketë një qasje tjetër ndryshe nga e kaluara” tha ai. Mbledhjen e së premtes Këshilli bashkiak mes debateve të shumta ka vendosur që buxheti të rishikohet dhe njëherë dhe më pas të rikthehet për miratim në javët e para të janarit. Mazhoranca ka kërkuar që të rishikohet buxheti duke deklaruar se nuk eshte i qarte projekti per investimet. Nderkaq Ferdinand Poni i PD tha se gjithçka eshte e qarte, duke e konsideruar te pabaze pretendimin e te majteve, per te mos e votuar ate. Nderkaq gjate paradites mungesa e kryebashkiakut Lulzim Basha për të prezantuar projekbuxhetin afatmesëm 2014-2016 shkaktoi debate në mbledhjen e Këshillit bashkiak. Të majtët e quajtën shpërfillje për Tiranën mospraninë e Bashës, madje shkuan më tej kur kërkuan që nëse Basha nuk mund të mbajë të dy postet të tërhiqet nga kryetari i Bashkisë. Nënkryetari i bashkisë, Eno Bozdo, tha se buxheti total i Bashkisë së Tiranës për vitin 2014 është mbi 8 miliardë e 600 milionë lekë. Me buxhetin afatmesëm sipas nënkryetarit do të realizohen prjokte strategjike.

Kuvendi i Shqipërisë u mblodh sot në orën 11:00 në seancë plenare ku po shqyrtohet nen për nen dhe më pas të miratohet buxheti 2014 dhe paketa fiskale. Në 24 dhjetor pas një seance maratonë prej 25 orësh debate dhe diskutime mes deputetëve Kuvendi votoi në parim buxhetin dhe paketën fiskale. Në seancën e sotme do të hidhen për votim edhe amendamentet e partive politike. Kreu i PD, Lulzim Basha i bëri dje ftesë Ilir Metës që të bashkojnë votat për të miratuar ndryshimin në paketën fiskale për të ulur taksimin për biznesin fason. PD propozoi 39 amendamente, të cilat u bazuan në konsultimet me grupet e interest, por dhe në premtimet elektorale me të cilat sipas PD-së, PS fitoi zgjedhjet e 23 qershorit. Sot ministri e Ekonomisë Arben Ahmetaj dhe nënkryetari i LSI, Petrit Vasili bënë të ditur se qeveria ka rënë dakort që për biznesin fason të ketë një Paketë të vecantë që pritet të harthet brenda Pranverës të vitti 2914. Kjo pas një kërkese të LSI. Vetëm një ditë më parë Qeveria ka rrëzuar propozimin e deputetëve të LSI, që tatim-fitimi për biznesin fason të mos të rritet në 15 për qind, por të ruhet në masën aktuale 10 për qind.

Berisha: Stop presioneve

Ish kryeministri Berisha kërkoi që të votohet amendamenti për sigurinë ligjore. Ai u shpreh se bizneseve me të cilat janë nënshkruar kontratat me taksën 10% tashmë po u ndryshohen rregullat e lojës. “Kërkon që ky shtet të respektojë atë që quhet siguri ligjore dhe përbën zemrën e shtetit ligjor. Janë me qindra kontrata të firmosura me këtë shtet, janë projekte gjigande nga TAP, e deri tek gjigandi i Devollit, janë me qindra kontratat e tjera. Ky vendim është i ndëshkueshëm nga çdo gjykatë. Nga ky vendim do rrokullisen financat e vendit. Ky regjim fiskal pas zotimeve solemne do t’i thotë investitorëve se nuk do paguani 10 po 15 %. Kjo shkel marrëveshjet kontraktuale dhe është hap fatal për investimet. Ne pa pritur sot ju ndryshojmë rregullat në mes lojës. Ky veprim quhet zuzar. Ky veprim nuk mund të bëhet nga askush dhe është i ndëshkueshëm nga çdo gjykatë. Hapni këtu tiparin e dhjetra proceseve gjyqësore me të cilat do të rrokullisen më rëndë financat e shtetit. Ju shkelmoni një marrëdhënie kontratuale në mënyrë të pa imagjinueshme. Unë kërkoj që qeveria të heq dorë nga përdorimi i kësaj platforme mashtrime dhe vetëm mashtrime.Kërkoj që të tërhiqen nga kjo taksë. Del i ashtuquajtiri ministër në Ekonomisë, që eshtë tabula rasa në ekonomi, dhe flet për vendet e punës. Ty të ka ngelur ora në terr dhe injorancë të plotë duhet të dish mirë sa kushton një vend pune. Më duhet t’i them kryekreut, se këto ditë ka një shfaqje shumë të rëndë në tregjet financiare të vendit. U emetuan obligacionit 2-vjeçare në euro, dhe në vend të 40 mln euro të kërkuara, të gjitha ofertat e e marra së bashku, u kërkuan 24 mijë euro. U emetuan obligacione me interes fiks 7-vjeçar dhe sërish u ofruan shumë pak. Është rritur borxhi në vend. Ndërsa kreu i qeverisë është shpallur kukuthi i tregjeve të parasë, ndaj i them stop presionit të ekonomisë. Me këtë pesimizëm, dramacitet ju injektoni vetëm largim dhe frikë të parasë. Kërkoj që t’i jepet qytetarëve ndihma ekonomike, pagesa e aftësisë së kufizuar dhe paga e 13-të. Dhe të paguhen biletat 52 mijë e “Belle Air” sepse i latë shqiptarët rrugëve, me falimentimin që i bëtë kompanisë për ta marrë për vete”, tha Berisha.

Fasonët, qeveria paketë masash Brenda pranverës

Vasili: Hartimi i një pakete për fasonët brenda pranverës

Nënkryetari i LSI, Petrit Vasili theksoi se mbështetja për fasonët është e rëndësishme për punësimin dhe theksoi se qeveria ka garantuar se do të diskutojë problematikën e sektorit fason. “Hartimi i kësaj pakete për fasonët brenda pranverës. Do të rishprehemi gjatë 3 muajve të ardhshëm në parlament”, tha Vasili.

Ahmetaj: Paketa e masave brenda pranverës

Ministri i Ekonomisë, Arben Ahmetaj theksoi se një paketë masash në mbështetje të fasonëve do të merret brenda pranverës. “Pakete masash në mbështetje të masonëve brenda pranverës. Trajtimi i fasonëve, shqetësim i përbashkët”, tha Ahmetaj. Ndërkohë, nuk është votuart amendamenti i propozuar nga PD, z Fatmir Mediu. Madje është votuar kundër amendamentit të propozuar nga deputeti i PD Ridvan Bode

Hidhet poshtë amendamenti për ccështjet e arsimit, i porpozuar nga Tafaj

Votohet kundër amendamentit për arsimin i propozuar nga deputeti Myqerem Tafaj. Kundër u votua dhe me kartona dhe me elektronike.

Tafaj: Të ulet taksimi për pagat e mësuesve

Duke përllogaritur masën e fitimit që marrin mësuesit nga taksa progresive përfitimi nuk është as sa gjysma e atij që merrnin. Pagat e mësuesve nuk do të kenë rritje në 3 vite që vinë, kjo do ketë efekte negative në cilësinë e sistemit arsimor. Mos aplikimin e rritjes së pagave të mësuesve do frenonte kthimin e studentëve shqiptarë të arsimuar jashtë. Ne mendojmë që një mësues të përfitojë nga tatimi i ri është e nevojshme të bëhen ndryshime. Propozojmë ndryshim të taksimit për pagat mbi 30 mijë lekë të reja taksimi të jetë 5% .

Nikolla: Rritëm pagat e mësuesve

Po gjatë qeverisjes tuaj u rrit pagesa për mësuesit 3 mijë deri në 5 mijë euro për një vend pune. U rrit pagesa e mësuesit për të blerë kreditit. U rrit paga dhe buxheti i mësuesve duke punësuar militantë, duke futur mësues më shumë se ç’duhej. Keqtrajtuat dhe denigruat figurën e mësuesit.

Një aksident automobilistik me pasojë 3 persona të plagosur është shënuar sot në aksin rrugor Cërrik-Elbasan. Policia bëri të ditur se pak pas mesdite u përplasën 2 autovetura dhe si pasojë 3 persona mbetën të plagosur. Shkak i aksidentit ishte shpejtësia me të cilin udhëtonin dy drejtuesit e mjeteve.

Edhe gjatë ditës së sotme ka vijuar fluksi i emigrantëve shqiptarë që kthehen në Atdhe për të festuar festat e fundvitit. “Mësohet se gjatë 14 orëve të fundit, pranë vendkalimit kufitarë të Kakavijës kanë hyrë 5000 persona, 2200 automjete, si dhe 45 autobusë të linjës ndërkombëtare Athinë-Tiranë. Aktualisht situata në Kakavijë paraqitet e qetë, por parashikohet në nesër dhe pasnesër të dyfishohet fluksi i emigrantëve që vijnë në Atdhe”-raportohet në media. Sipas statistikave nga Drejtoria Rajonale e Kufirit dhe Migracionit të qarkut të Gjirokastrës, gjatë periudhës 10 ditore kanë hyrë në Shqipëri mbi 40 mijë emigrantë, ndërsa 20 mijë kanë dalë nga territori shqiptarë nëpërmjet vendkalimit kufitar të Kakavijës.

Kuvendi i Shqipërisë miratoi me 82 vota pro buxhetin e vitit 2014 dhe paketën fiskale, ndërkohë që opozita votoi kundër.

Rama: Garantuam përfundimisht ndalimin e rrënimit

Në seancën e parlamentit që vijon prej paradites së sotme, kryeministri Edi Rama e cilësoi buxhetin e vitit 2014, si buxhetin që ka grasatuar përfundimisht ndalimin e rrënimit të vendit.  Nga foltorja e Kuvendit, kryeministri iu përgjigj akuzave të opozitës për mos mbajtjen e premtimeve elektorale, duke thënë: “Ju flisni sikur ne jemi në fund të katër vjecarit, dhe sikur ju 100 ditë përpara nuk ishit në qeveri por keni 8 vjet në opozitë, sikur borxhet që keni lënë nuk janë tuajat, sikur detyrimi për tu përballur me këto borxh nuk a lidhje me ju”.

Kuvendi miraton nen për nen dhe në tërësi paketën fiskale për vitin 2014

Kuvendi i Shqipërisë miratoi nen për nen dhe në tërësi me shumicë votash paketën fiskale për vitin 2014, ndërkohë që opozita votoi kundër. Sipas ministrit të Financave Shkëlqim Cani, buxheti i vitit 2014 është ndërtuar mbi bazën e një politike fiskale me mjaft të reja. Në vazhdim të premtimit elektoral, është hequr dorë nga tatimi i sheshtë, është realizuar parimi se kush fiton më shumë, paguan më shumë. Paketa e re fiskale dallohet për ndërtimin e saj në funksion të stabilizimit të ekonomisë, duke synuar të gjenerojë rreth 18 miliard lekë shtesë të ardhura nga Tatimet dhe Doganat. Kjo barrë fiskale shpërndahet midis bizneseve dhe individëve.  Opozita gjatë diskutimit në parim akuzoi qeverinë se ka hartuar një program buxhetor dhe fiskal në panik që nuk orienton problematikën që ka ekonomia e vendit. Në fjalën e tij, ish ministri i Financave Bode tha se dy instrumentet e zgjedhur nga kjo qeveri, rritja e taksave dhe borxhi publik, veçse përshpejtojnë kolapsin ekonomik.  Por, ministri i Financave Shkëlqim Cani, për vitin 2014 parashikohet rritje e të ardhurave, që do të gjenerohen përmes një reforme fiskale, përmes paketës së re për ndryshimin e një sërë tatimesh dhe taksash kombëtare e vendore, ku synohet balancimi i trinomit të interesave midis shtetit, biznesit dhe individit, përmes forcimit të disiplinës fiskale, konsolidimit të administratës tatimore, ndryshimit të mentalitetit dhe rritjes së përgjegjshmërisë në përdorimin e fondeve publike, si dhe uljes së nivelit të borxhit publik. Kjo paketë fiskale parashikon një sërë masash, nëpërmjet të cilave do të sigurohet rritje e të ardhurave nga tatimet dhe doganat me rreth 18 miliardë lekë.

Berisha: Opozita do të mbrojë amendamentin për fasonët

Deputeti i PD-së, Sali Berisha u shpreh në Kuvend, gjatë seancës për miratimin nen për nen të Paketës Fiskale dhe projekt buxhetit të ri se, lidhur me amendamentin e LSI-së për fasonët se “edhe opozita e kishte të gatshëm amendamentin dhe meqenëse ju avancuat ne u bashkëngjitëm pa asnjë kompleks, me interesin më të mirë të atyre bizneseve. Tani, del qartë se parlamenti nuk është më Meta-Rama, por është Rama-Meta, është diktati tiranik i ekzekutivit mbi këtë tempull që sjell ndryshim katasrofal të pozicionit të LSI në raport me Fasonët. Grupi i deputetëve të PD e mbështeti publikisht. Ne nuk paraqitem amendamentin tonë sepse mbështetem tuajat, tani duhet të mbrojmë propozimin tone”.  Berisha gjithashtu paraqiti amendamentin e opozitës për respektimin e kontratave me kompanitë e huaj në disa sektorë. “Amendamenti që paraqes është në përputhje të plotë me rregulloren, nenet dhe ligjin për të cilin ne jemi mbledhur sot këtu. Çfarë kërkon ky amendament? Ky amendament kërkon që ky shtet, të respektojë atë që quhet siguri ligjore, që përbën zemrën e shtetit ligjor, e ligjit dhe funksionimit të tij. Janë me qindra dhe mijëra kontrata të firmosura me këtë shtet, janë projekte gjigante nga gazsjellësi Trans-Adriatik tek gjiganti i Devollit, janë me qindra kontrata të tjera, janë miliarda euro të marra kredi mbi bazën e këtyre kontratave, të cilat do të ktheheshin në afate të caktuara në një regjim fiskal të caktuar 10% dhe ne papritmas, sot, ju ndryshojmë këtyre rregullat në mes të lojës. Ky veprim në shqip quhet zuzar, ky veprim nuk mund të behet nga askush. Ky veprim është i ndëshkueshëm nga çdo gjykatë dhe ju hapni këtu siparin e dhjetëra dhe qindra proceseve gjyqësore, me të cilat do të rrokullisen më rëndë financat e shtetit”, -tha Berisha.

MAS publikon kriteret për njohjen e diplomave të huaja

Lista me 1415 emrat për të cilët është kryer përshtatja e certifikatave. Dosja e plotë me dokumentet që duhen dorëzuar dhe dëshmitë që merren në shqyrtim

Numri i studentëve shqiptar, të cilët kanë dorëzuar dokumentet në MAS për konvertimin e diplomës është rritur kohët e fundit. Përfaqësues pranë këtij dikasteri  pohojnë se për periudha të caktuara ka pasur dyndje për konvertimin e diplomave të huaja dhe kryesisht, janë studentë të kthyer nga shtetet fqinje, si Italia apo Greqia. Ndër të tjera, specialistët thonë se për t’u ardhur në ndihmë të rinjve të sapo kthyer, që duan të punësohen në vend apo të vazhdojnë studimet, procedurat për njohjen e diplomave kryhen në një kohë më të shkurtër se 45-ditshi, ndërsa për rastet që dyshohen se kanë dokumente të falsifikuara, procedurat zgjasin.

Certifikatat që merren në shqyrtim

Burime pranë MAS-it konfirmojnë se fusha e veprimtarisë së njohjes së kualifikimeve të fituara kryhet nga Drejtoria e Politikave të Arsimit të Lartë dhe ka për qëllim:

a) Të administrojë dhe të kryejë procedurat për të gjitha aplikimet për njohje të diplomave të përfunduara të ciklit të parë, të ciklit të dytë, të diplomave Master i Nivelit të Dytë, si dhe certifikatave të specializimit të fituara jashtë shtetit;

b) Të kryejë procedurën verifikuese për vërtetësinë e certifikatave apo diplomave të tjera universitare, të fituara jashtë shtetit kur kërkohet nga institucione të tjera;

c) Të kryejë procedurën verifikuese për vërtetësinë e certifikatave apo diplomave universitare të fituara në Republikën e Shqipërisë, kur kërkohet nga institucione të tjera jashtë shtetit. Ndërkohë, MAS-i nuk do të shqyrtojë diploma dhe kualifikime të fituara nga institucione të akredituara në Republikën e Shqipërisë, kurse studimi të paplotësuara. Këto shqyrtohen nga Institucioni i Arsimit të Lartë, ku aplikanti kërkon të vijojë/përfundojë studimet në përputhje me statutin/rregulloren e tij; certifikata për kurse të vetme si gjuhë e huaj, kompjuter, diploma ose certifikata lëshuar nga institucione të huaja që nuk kanë legjitimitetin e duhur; dokumentet që nuk janë origjinale apo të njëvlershme me to, diploma ose certifikata të fituara në shkolla të larta ushtarake, përjashtuar diplomat për drejtime civile të studimeve, si dhe diploma dhe certifikata të fituara në shkolla të larta fetare, përjashtuar diplomat për drejtimet civile të studimeve.

Procedura e aplikimit

Sipas udhëzimit më të ri të Ministrisë së Arsimit dhe Sportit, dosja e aplikimit duhet të përmbajë dokumentet e mëposhtme:

a) Formatin e aplikimit të plotësuar;

b) Diplomën ose certifikatën/vërtetimin e diplomimit;

c) Listën e notave ose suplementin e diplomës;

d) Dokument zyrtar identiteti: fotokopje e pasaportës dhe kartës së identitetit për shtetasit shqiptarë dhe të huaj;

e) Mandat-pagesën.

Dokumentet pranohen origjinalë ose fotokopje të noterizuara. Ndërsa për shtetasit e huaj, dokumentet duhet të jenë me përkthim të vërtetuar. Sipas udhëzimit të MASH-it, të paktën një nga dokumentet bazë që konfirmon diplomimin apo mbarimin e suksesshëm të kursit të studimit që do njihet, duhet të jetë i legalizuar me Vulën Apostille ose nga Ambasada Shqiptare, ose nga Ministria e Punëve të Jashtme e Shqipërisë. Në rast pamundësie të marrjes së legalizimit, aplikimi do të pranohet edhe pa dokument të legalizuar. Aplikimi duhet të dërgohet me postë në Zyrën e Marrëdhënieve me Publikun të MAS-it. Brenda 3 (tre) ditësh, Sektori i Njohjes së Diplomave (SENJOD) informon aplikantin për mbërritjen dhe plotësinë e dosjes. Sipas udhëzimit, aplikimi nuk quhet i plotë, nëse mungon një nga dokumentet e cituara më sipër. Informimi mund të bëhet me e-mail ose postë të zakonshme. Nëse komunikimi bëhet me e-mail, duhet të konfirmohet marrja e tij nga aplikanti.

Verifikimi i vërtetësisë së dokumenteve

SENJOD (Sektori i Njohjes së Diplomave) kryen verifikimin për të gjitha rastet, përfshi edhe njohjen e drejtpërdrejtë, të autenticitetit të diplomës apo certifikatës së huaj si të statusit dhe legjitimitetin e institucionit që e ka lëshuar. Për vërtetësinë e diplomimit ose plotësimit të programit të studimit të pretenduar, SENJOD bazohet në dokumentin zyrtar që e konfirmon këtë. Në të gjitha rastet kur dokumenti bazë nuk është i legalizuar nuk bazohet në dokumentin e paraqitur, por kryen verifikimin e tij me postë, faks ose e-mail me Institucionin e Arsimit të Lartë ku është kryer kursi i studimeve. Materialet shkresore ose të printuara për të gjitha verifikimet e kryera, depozitohen në dosjen e aplikantit. Komisioni i Njohjes, pasi vë në dijeni ministrin, me miratimin e tij pezullon procedurën e njohjes për raste ose grup-raste të veçanta, kur ka informacione dhe konstatime që hedhin dyshime mbi vërtetësinë e dokumenteve shkollore ose kryerjen e programit të studimit të pretenduar dhe përcakton afatet dhe masat për mbylljen e procedurës. Gazeta “Republika” boton të plotë sot listën e personave që iu është konvertuar diploma këtë vit

NGA  OSMAN DEDJA

LISTA E DIPLOMAVE TË NJËSUARA Në Sektorin e Njohjes së Diplomave, Fondit të Ekselencës dhe Brain Gain